तुम्ही घरातच बसा : तुकाराम मुंढे :संजय पाटील

संजय पाटील; नागपूर : सरकारने अनेकदा आवाहन करुनही नागरिक रस्त्यावर फिरताना दिसतच आहेत. नागपूरचे महापालिका आयुक्त तुकाराम मुंढे या नागरिकांविरोधात अत्यंत आक्रमक झाले आहेत. संपूर्ण प्रशासन तुमच्यासाठी रस्त्यावर आहे, तुम्ही घरातच बसा, कृपा करुन मला बळाचा वापर करायला लावू नका, अशी विनंती करतच त्यांनी बेजबाबदार नागरिकांना इशाराही दिला आहे. लॉकडाऊनचा अर्थ समजून घ्या आणि घरात राहा, अन्यथा आम्हाला शेवटचं पाऊल उचलावंच लागेल, असा इशाराही तुकाराम मुंढे यांनी दिला.

'तुम्ही साथ दिली तर लॉकडाऊनची गरज पडली नसती. लॉकडाऊन म्हणजे जवळपास संचारबंदी लागू झालेली आहे. तरीही लोक अजून फिरताना दिसत आहेत. पुन्हा एकदा विनंती करतोय, कृपया लॉकडाऊनचा अर्थ समजून घ्या. स्वतः घरात राहणे असा याचा अर्थ होतो. हा आजार एकमेकांपासून होणार नाही हा याचा उद्देश आहे. जे घरात राहतील त्यांनाच याचा फायदा होणार आहे. तुमच्यासाठी सर्व प्रशासन रस्त्यावर उतरलं आहे. इतर सर्व कामं बाजूला ठेवून आम्ही तुमच्या सुरक्षेसाठी काम करत आहोत. हे सर्व चालू असताना तुम्ही रस्त्यावर येत आहात. याचा दुष्परिणाम आपल्याच कुटुंबावर होईल, पुन्हा काहीही करता येणार नाही. गरज आहे ती वेळेत आणि वेळेतच सुरक्षा उपाय घेण्याची. घराच्या बाहेर न पडणे हा चांगला उपाय आहे. कायद्यानुसार सर्व आदेश जारी झाले आहेत, त्याची अंमलबजावणी होत आहे. मी स्वतः आणि पोलीस आयुक्त स्वतः सांगत आहेत, तरीही ऐकत नसाल तर सक्तीने तुम्हाला घरात बसावं लागेल. आम्हाला ही ताकद वापरायला लावू नका ही तुमच्याकडून अपेक्षा आहे. नागपूरच्या सर्व नागरिकांना कळकळीची विनंती आहे, कृपा करुन घराच्या बाहेर पडू नका, अशी विनंती तुकाराम मुंढे यांनी केली.

'आमचं सर्व परिस्थितीवर लक्ष आहे, त्याचा आढावा घेतला जात आहे. या आढाव्यानुसार परिस्थिती नियंत्रणात आहे आणि तुम्ही सहकार्य केलं नाही तर ही परिस्थिती नियंत्रणाच्या बाहेर जाईल. सर्व वैद्यकीय अधिकारी, प्रशासन तुमच्यासाठी काम करत आहे, त्यांना साथ द्या. सक्तीने तुम्हाला डांबून ठेवण्याची वेळ येऊ देऊ नका. घराच्या बाहेर असाल, तर घरी जा आणि बाहेर पडू नका, असं ते म्हणाले. अजूनही सामुदायिक संसर्ग झालेला नाही आणि तो आपल्याला टाळायचा आहे, असं त्यांनी सांगितलं.