पोलिस मुख्यालयात पैसे दिल्याशिवाय कामच होत नाही : संजय पाटील

पोलिस शिपायाचा व्हिडीओ व्हायरल

नागपूर : नागपूर प्रेस मीडिया : 24 मे 2020 : पोलिस मुख्यालयात ड्युटी रायटर व अधिकाऱ्यांना पैसे दिल्याशिवाय काम होत नाही. पैसे दिले की ते इच्छुक ठिकाणी ड्युटी लावतात, न दिल्यास छळ करतात, असा आरोप करणारा पोलिस मुख्यालयातीलच पोलिस शिपायाचा व्हिडीओ व्हायरल झाला. या व्हिडीओमुळे पोलिस मुख्यालयातील गैरप्रकार व भ्रष्टाचार पुन्हा एकदा चर्चेत आला आहे. सतीश शुक्ला असे या पोलिस शिपायाचे नाव आहे.

सतीश शुक्ला अडीच महिन्यांपासून क्वारन्टाइन गार्ड म्हणून ड्युटी करीत आहेत. त्याने मुख्यालयातील ड्युटी रायटरला अनेकदा ड्युटी बदलविण्याची विनंती केली. पण, रायटरने नकार दिला. त्यामुळे शुक्ला हा अडीच महिन्यांपासून घरी गेलेला नाही. तो पोलिस मुख्यालयाजवळील जंगलातच झोपत आहे. पोलिस मुख्यालयातील तरुण पोलिस 'सेटिंग' करून इच्छुक ठिकाणी ड्युटी करीत आहेत. मात्र, आपल्याला ते जमत नसल्याने 'क्वारन्टाइन गार्ड'मध्ये ड्युटी लावण्यात येत असल्याचे या शिपायाचे म्हणणे आहे.

'तो' अधिकारी पुन्हा परतला

दोन वर्षांपूर्वी पोलिस मुख्यालयातील अधिकारी पैसे घेऊन ड्युटी लावत असल्याचा गैरप्रकार चव्हाट्यावर आला होता. तत्कालीन पोलिस आयुक्त डॉ. के. व्यंकटेशम यांनी या प्रकरणाची गंभीर देखल घेत चौकशीचे आदेश दिले होते. मुख्यालयातील एका अधिकाऱ्याला चांगलेच खडसावले होते. त्यामुळे हा अधिकारी तडकाफडकी आजारी रजेवर गेला. व्यंकटेशम यांची पुण्याला बदली होताच अवघ्या दहा दिवसांत हा अधिकारी पुन्हा कर्तव्यावर परतला, अशी चर्चा पोलिस दलात आहे. पोलिस मुख्यालयातील भ्रष्टाचाराचा कथा सतत समोर येत आहेत, आता पोलिस आयुक्त डॉ. भूषणकुमार उपाध्याय काय कारवाई करतात, याकडे लक्ष लागले आहे.

खुनाच्या गुन्ह्यात शिक्षा, निलंबित करणार : साळी

शुक्ला याच्याविरुद्ध खुनाचा गुन्हा दाखल आहे. या खटल्यात त्याला शिक्षाही झाली आहे. याप्रकरणात त्याला निलंबित करण्यता आले होते. परंतु, तो पुन्हा रुजू झाला. आता त्याचा व्हिडीओ व्हायरल झाला आहे. शुक्ला हा वादग्रस्त असून त्याला निलंबित करण्यात येणार आहे, अशी माहिती पोलिस मुख्यालयाचे उपायुक्त विक्रम साळी यांनी दिली.